School fees mu bigo bya leta igiye kuringanizwa.

0
122

Minisitiri w’Intebe, Dr Edouard Ngirente, yatangaje ko mbere y’itangira ry’umwaka w’amashuri wa 2022/2023 hazaba hashyizweho gahunda yo kuringaniza amafaranga y’ishuri mu bigo bya leta n’ibyigenga bifatanya na leta.

Ikigamijwe ni ugushyira ku murongo imitangirwe y’amafaranga y’ishuri usanga irimo itandukaniro rinini mu mashuri yisumbuye ya leta.

Ni kimwe mu bibazo byabajijwe Minisitiri w’Intebe ubwo yaganiraga n’abagize Inteko Ishinga Amategeko, ku wa 1 Kanama 2022 nyuma yo guhura na cyo mu ngendo bakorera mu turere.

Depite Nyabyenda Damien, yagize ati “Mu ngendo twakoze twasanze harimo itandukaniro rinini hagati y’ibigo by’amashuri aho bimwe bishobora kwaka amafaranga agera ku bihumbi 250 Frw ku mwaka ibindi bikaka arenga ibihumbi 500 Frw.”

“Nabazaga niba hari umurongo ngenderwaho mu gushyiraho amafaranga y’ishuri yakwa mu bigo bya leta n’iby’abafatanya na leta ku bw’amasezerano mu mashuri yisumbuye.”

Dr Ngirente yamusubije ko mbere y’uko umwaka w’amashuri utangira muri Nzeri uyu mwaka hazaba hashyizweho amafaranga y’ishuri angana ku mashuri yose.

Ati “Ibyo rwose birakemuka muri iyi ntangiriro y’umwaka w’amashuri ku buryo umwana wiga mu mashuri ya leta mu Rwanda ariha amafaranga runaka ku mwaka.”

Minisitiri w’Intebe yanavuze ko ibijyanye n’imitangirwe y’agahimbazamusyi na byo bizashyirwa ku murongo hakajyaho amafaranga ibigo bitagomba kurenza.

Gahunda yo kuringaniza amafaranga y’ishuri mu bigo byose byakira abanyeshuri biga bacumbikiwe inateganyijwe ku biga imyuga n’ubumenyingiro nk’uko biherutse gutangazwa n’Umuyobozi Mukuru w’Urwego rw’Igihugu rushinzwe guteza imbere amashuri ya Tekiniki, Imyuga n’Ubumenyingiri (Rwanda TVET Board), Eng. Paul Umukunzi.

Uru rwego rwanagabanyije amafaranga y’ishuri yasabwaga abanyeshuri biga bacumbikiwe ho 30% uhereye mu gihembwe cya gatatu cy’umwaka w’amashuri wa 2021/2022 kugira ngo ababyeyi boroherezwe ndetse hafungurwe amarembo ku muntu wese ushaka kwiga muri TVET wazitirwaga n’uko amafaranga yishyurwaga ari menshi.

Ni nyuma y’aho leta yakoresheje agera kuri miliyari eshanu z’amafaranga y’u Rwanda mu kugura ibikoresho bikenerwa mu mashuri ya TVET, bigasaranganywa amashuri yose ya leta n’ayigenga afatanya na leta.

Eng. Umukunzi ati “Niba ibigo bibasha kwigurira ibyo bikoresho bivuze ko n’amafaranga ababyeyi batangaga agomba kugira icyo agabanukaho. Byarakozwe, ikaba ari yo mpamvu 30% ikwiye kugabanukaho kandi akaba ari urugendo turi gutangira ruzanakomeza kuko amasomo y’ibanze ya TVET ni amwe mu abarizwa mu cyiciro cy’uburezi bw’ibanze kandi uburezi bw’ibanze muri rusange bwakabaye ari ubuntu.”

Ibi bivuze ko no mu kuringaniza amafaranga y’ishuri bishoboka ko hari ibyo leta izirengera nk’ibyasabwaga mu mashuri y’icyitegrerezo dore ko ari yo usanga ahenze nk’uko umwe mu basesenguzi yabibwiye IGIHE.

Minisitiri w’Uburezi, Dr Uwamariya Valentine, ku wa 1 Kanama, yashimangiye ko amabwiriza ajyanye n’imitangire y’amafaranga y’ishuri mu mashuri ya Leta n’afatanya na Leta ku bw’amasezerano agiye gutangazwa mu rwego rwo gukumira ibyatumaga ababyeyi basabwa amafaranga y’umurengera hagamijwe kuzamura mwarimu.

SOURCE: IGIHE.COM

Share This

LEAVE A REPLY

Please enter your comment!
Please enter your name here